અમેરિકા: હિન્દુ મંદિર પર માસ શૂટિંગનું મોટું કાવતરું નિષ્ફળ, ‘ગોરાઓ જ સર્વોપરી છે’ એવી માનસિકતા ધરાવતો 19 વર્ષીય યુવક ઝડપાયો

અમેરિકામાં હિન્દુ મંદિરને નિશાન બનાવીને કરવામાં આવનારું સામૂહિક ગોળીબાર (માસ શૂટિંગ)નું એક ગંભીર કાવતરું પર્દાફાશ થયું છે. પોલીસે આ મામલે 19 વર્ષીય શ્વેત વર્ચસ્વવાદી યુવકની ધરપકડ કરી છે, જેણે આ ભયાનક યોજના સાથે જોડાયેલા દસ્તાવેજો અને હથિયારોની તસવીરો શેર કરી હતી.

રાઇફલ, મેગેઝિન અને કારતૂસ જપ્ત

માહિતી મળ્યા બાદ પેલેટાઇન અને માઉન્ટ પ્રોસ્પેક્ટ પોલીસે સંયુક્ત કાર્યવાહી કરી હતી. 11 ઓક્ટોબરની સાંજે આરોપીને તેના ઘરમાંથી બહાર નીકળતી વખતે કસ્ટડીમાં લેવામાં આવ્યો હતો. આ પછી તેના ઘરની તલાશી લેવામાં આવી, જ્યાંથી એક રાઇફલ, અનેક ભરેલી મેગેઝિન, સેંકડો કારતૂસ, ટેક્ટિકલ સાધનો અને બોડી આર્મરવાળી વેસ્ટ મળી આવી હતી. વેસ્ટ પર શ્વેત વર્ચસ્વવાદી ઉગ્રવાદ સાથે જોડાયેલી તસવીરવાળો પેચ પણ મળી આવ્યો હતો.

તપાસ દરમિયાન પોલીસને આરોપી દ્વારા લખાયેલો એક દસ્તાવેજ મળ્યો, જેનું શીર્ષક ‘મેં શા માટે લડાઈ લડી: A.K.A.: (ઓરોરા શૂટરનું મેનિફેસ્ટો)’ હતું. પોલીસના જણાવ્યા અનુસાર, તેમાં શ્વેત વર્ચસ્વવાદી અને ઉગ્રવાદી વિચારધારાની સાથે દક્ષિણ એશિયન મૂળના લોકો, ખાસ કરીને ભારતીયો વિરુદ્ધ હિંસાનો ઉલ્લેખ હતો.

આતંકવાદી ચેતવણી (ટેરર વોર્નિંગ)ના આરોપો

આ કેસની તપાસમાં એફબીઆઈ (FBI) ની શિકાગો ઓફિસ પણ સામેલ છે. પોલીસે આરોપી પર આતંકવાદી ધમકી આપવા અને નિર્ધારિત મર્યાદા કરતાં ઓછી લંબાઈની બેરલવાળી રાઇફલ રાખવાના આરોપ લગાવ્યા છે. 14 ઓક્ટોબરે સુનાવણી બાદ અદાલતે તેને કસ્ટડીમાં રાખવાનો આદેશ આપ્યો છે. તેની આગામી સુનાવણી 30 ઓક્ટોબરે નક્કી કરવામાં આવી છે.

ઓરોરા પોલીસે વિસ્તારના હિન્દુ ધાર્મિક સ્થળોને સંભવિત જોખમ અંગે માહિતી આપીને સતર્ક કર્યા છે. અધિકારીઓના જણાવ્યા અનુસાર, હાલમાં આ મામલા સાથે જોડાયેલું સામાન્ય જનતા માટે કોઈ સક્રિય જોખમ સામે આવ્યું નથી. તપાસ ચાલુ છે અને આરોપી વિરુદ્ધ વધારાના આરોપો પણ લગાવી શકાય છે.