એશિયન ગેમ્સમાં સુજીત કલકલે કર્યો મોટો ઉલટફેર, અંતિમ 90 સેકન્ડમાં પલટાવી બાજી અને જીત્યો ગોલ્ડ

ભારતીય રેસલર સુજીત કલકલે એશિયન ગેમ્સ 2026ની કુસ્તીમાં શાનદાર પ્રદર્શન કરતાં ગોલ્ડ મેડલ પોતાના નામે કર્યો છે. પુરુષોના 65 કિલોગ્રામ ફ્રીસ્ટાઇલ વર્ગની ફાઇનલમાં તેમણે તાજિકિસ્તાનના અબ્દુલમાજિદ કુદીએવને 10-9ના રોમાંચક સ્કોરથી હરાવ્યો.

આ મુકાબલો અત્યંત રોમાંચક રહ્યો હતો. એક સમયે સુજીત 2-9થી પાછળ ચાલી રહ્યા હતા અને તેમની હાર લગભગ નિશ્ચિત માનવામાં આવી રહી હતી. પ્રથમ રાઉન્ડમાં તેઓ 2-4થી પાછળ હતા. ત્યારબાદ બીજા રાઉન્ડમાં તાજિકિસ્તાનના પહેલવાને પોતાની લીડ વધારીને સ્કોર 9-2 કરી દીધો.

પરંતુ સુજીતે હિંમત ન હારી. મુકાબલાના અંતિમ લગભગ દોઢ મિનિટમાં તેમણે જોરદાર વાપસી કરી અને આખી બાજી જ પલટી નાખી.

અંતિમ મિનિટમાં સુજીતની ધમાકેદાર વાપસી

મોટા અંતરથી પાછળ હોવા છતાં સુજીતે હાર સ્વીકારી નહીં. મુકાબલાના અંતિમ એક મિનિટમાં તેમણે શાનદાર વાપસી કરતાં વિરોધી પહેલવાનને સતત ચાર વખત પટકીને કુલ 8 પોઈન્ટ મેળવ્યા.

આ શાનદાર પ્રદર્શનથી સ્કોર 2-9થી સુધરીને 8-9 થયો. હવે તાજિકિસ્તાનનો પહેલવાન માત્ર એક પોઈન્ટથી આગળ હતો અને મુકાબલો પૂરો થવામાં ગણતરીની જ સેકન્ડ બાકી હતી.

સુજીતને જીત માટે માત્ર એક સચોટ દાવની જરૂર હતી.

અંતિમ 10 સેકન્ડમાં પલટાઈ આખી બાજી

મેચ પૂરો થવામાં માત્ર 10 સેકન્ડ બાકી હતા, ત્યારે સુજીતે ફરી એક જોરદાર દાવ લગાવ્યો અને વિરોધી પહેલવાનને નીચે પટક્યો. આ દાવથી તેમને 2 પોઈન્ટ મળ્યા અને સ્કોર 10-9 થઈ ગયો.

આ રીતે 2-9થી પાછળ રહ્યા બાદ પણ સુજીત કલકલે અદમ્ય હિંમત અને શાનદાર પલટવારના બળે 10-9થી મુકાબલો જીતી લીધો અને ભારત માટે ગોલ્ડ મેડલ પોતાના નામે કર્યો.

સુજીતની આ જીત દર્શાવે છે કે મુશ્કેલ પરિસ્થિતિમાં પણ તેમણે હિંમત ન હારી અને યોગ્ય સમયે સચોટ દાવ લગાવીને હારેલી લાગતી બાજીને જીતમાં ફેરવી દીધી.

હરિયાણાના રહેવાસી છે સુજીત કલકલ

સુજીત કલકલ મૂળ હરિયાણાના ચરખી દાદરીના રહેવાસી છે. તેમનો જન્મ 5 નવેમ્બર 2002ના રોજ થયો હતો. તેમને કુસ્તીની પ્રેરણા તેમના પિતા દયાનંદ કલકલ પાસેથી મળી હતી, જેઓ પોતે પણ રાષ્ટ્રીય સ્તરના પહેલવાન રહી ચૂક્યા છે.

સુજીતે અંડર-20 અને અંડર-23 સ્તરની એશિયન ચેમ્પિયનશિપમાં ગોલ્ડ મેડલ જીત્યા છે. વર્ષ 2025માં સર્બિયાના નોવી સાદ ખાતે યોજાયેલી અંડર-23 વર્લ્ડ ચેમ્પિયનશિપમાં પણ તેમણે ગોલ્ડ મેડલ જીત્યો હતો.

એશિયન ગેમ્સમાં 65 કિલોગ્રામ ફ્રીસ્ટાઇલ વર્ગમાં મળેલું આ ગોલ્ડ મેડલ સુજીત કલકલની કારકિર્દીની વધુ એક મોટી સિદ્ધિ બની છે.