સાગડાપાડાના તળગામ કટારા ફળિયામાં પાકો તો ઠીક, કાચો રસ્તો પણ નસીબમાં નહીં

દાહોદ જિલ્લાના સુખસર તાલુકાના સાગડાપાડા ગામના તળગામ કટારા ફળિયામાં વર્ષો બાદ પણ રસ્તાની પાયાની સુવિધા ઉપલબ્ધ ન હોવાથી ગ્રામજનો મુશ્કેલીનો સામનો કરી રહ્યા છે. મુખ્ય રસ્તાથી ફળિયા સુધી પહોંચવા માટે માત્ર પગદંડી જેવી વાટ હોવાથી વાહનવ્યવહાર પણ મુશ્કેલ બન્યો છે. ચોમાસા દરમિયાન કીચડ અને પાણી ભરાઈ જતાં પરિસ્થિતિ વધુ ગંભીર બની જાય છે.

ફળિયામાં રસ્તાના અભાવે સૌથી વધુ મુશ્કેલી બીમાર, વૃદ્ધો, બાળકો અને ઈમરજન્સી સમયે સર્જાય છે. દર્દીને ખાટલા અથવા ખભા પર ઉંચકીને મુખ્ય રસ્તા સુધી લઈ જવાની ફરજ પડતી હોવાનો ગ્રામજનોનો આક્ષેપ છે. તાજેતરમાં 13 વર્ષીય બાળકીના મોત બાદ તેના પિતાએ મૃતદેહને ખભા પર ઉંચકીને ઘરે લઈ જવો પડ્યો હોવાનો બનાવ સામે આવતા ફળિયાની રસ્તાની સમસ્યા ફરી ચર્ચામાં આવી છે.

સ્થાનિકોના જણાવ્યા મુજબ, રસ્તાની સુવિધા માટે ગ્રામ પંચાયત, જનપ્રતિનિધિઓ અને જવાબદાર તંત્ર સમક્ષ વર્ષોથી રજૂઆતો કરવામાં આવી હોવા છતાં હજુ સુધી સમસ્યાનો કાયમી ઉકેલ આવ્યો નથી. ચોમાસામાં પગદંડી કાદવથી લથબથ બની જતાં ફળિયાના લોકોની અવરજવર વધુ મુશ્કેલ બની જાય છે.

ગ્રામજનો દ્વારા તંત્ર સમક્ષ સવાલો ઉઠાવવામાં આવી રહ્યા છે કે ફળિયા સુધી રસ્તો બનાવવા માટે દરખાસ્ત કરવામાં આવી છે કે નહીં? દરખાસ્ત હોય તો મંજૂરી ક્યાં અટકી છે અને મંજૂરી મળી હોય તો કામ શરૂ કેમ થયું નથી? જો દરખાસ્ત જ કરવામાં આવી નથી તો તેનું કારણ શું છે?

ગ્રામજનોની માંગ છે કે તંત્રના અધિકારીઓ સ્થળ પર રૂબરૂ મુલાકાત લઈ વાસ્તવિક સ્થિતિનું નિરીક્ષણ કરે અને પગદંડીના સ્થાને વાહન જઈ શકે તેવો કાયમી રસ્તો બનાવે. ખાસ કરીને ચોમાસા દરમિયાન ઈમરજન્સી સ્થિતિમાં દર્દીઓને મુખ્ય રસ્તા સુધી પહોંચાડવામાં પડતી મુશ્કેલીને ધ્યાનમાં રાખીને તાત્કાલિક કાર્યવાહી કરવામાં આવે તેવી માંગ ઉઠી છે.

આઝાદીના 80 વર્ષ બાદ પણ પાયાની સુવિધા માટે વંચિત સાગડાપાડાના તળગામ કટારા ફળિયાના ગ્રામજનો હવે એક જ સવાલ કરી રહ્યા છે—પાકો રસ્તો ક્યારે મળશે એ પછીની વાત છે, પહેલા તો કાચો રસ્તો ક્યારે મળશે?

અહેવાલ : કિશોર પણદા, ફતેપુરા