તિબેટથી ત્રાટકેલા મોતના સેલાબે નેપાળને હચમચાવ્યું: 98 ના મોત, કૈલાશ માનસરોવર યાત્રાએ ગયેલા 133 ભારતીયો લાપતા

નેપાળથી બુધવારે આવેલી પૂરની તસવીરો તબાહીનું ડરામણું ચિત્ર રજૂ કરી રહી છે. તિબેટથી આવેલો ભીષણ ફ્લેશ ફ્લડ (અચાનક આવેલું પૂર) ભોટેકોશી નદીમાં એટલી ઝડપથી પહોંચ્યો કે લોકોને સંભળાવાનો કે સંભાળવાનો પણ મોકો મળ્યો નહીં. લોકો રોજિંદા કામોમાં વ્યસ્ત હતા, પરંતુ માત્ર થોડી જ સેકન્ડોમાં સેંકડો ફૂટ ઊંચો પાણીનો સેલાબ તેમની સામે હતો. જોતજોતામાં ચીસાચીસ મચી ગઈ અને લોકો જીવ બચાવવા ભાગવા લાગ્યા. સ્થાનિક લોકોના જણાવ્યા અનુસાર, પાણીનો પ્રવાહ એટલો તેજ હતો કે માત્ર 30 સેકન્ડમાં 2 મોટાં બજારોનો મોટો તબાહ થઈ ગયો. આ દુર્ઘટનામાં અત્યાર સુધીમાં 98 લોકોના જીવ જવાની ખબર છે અને મૃત્યુઆંક સતત વધી રહ્યો છે.

પૂરની ભયાનકતાનો અંદાજ એ વાત પરથી લગાવી શકાય છે કે સેલાબમાં ઘર અને દુકાનો તણાઈ ગયાં, ગાડીઓ ડૂબી ગઈ અને અનેક ઇમારતો કાટમાળ સાથે વહેતી નજરે પડી. ભોટેકોશી નદીના રસ્તામાં આવતું લગભગ દરેક માળખું આ સેલાબની ચપેટમાં આવ્યું છે. રિપોર્ટ્સ મુજબ, 3 પોલીસ ચોકીઓ, અનેક પુલ અને હાઇડ્રોપાવર પ્રોજેક્ટ્સને ભારે નુકસાન થયું છે. રસ્તાઓ અને અન્ય જરૂરી પાયાની માળખાકીય સુવિધાઓનો મોટો હિસ્સો પણ તબાહ થયો છે. સેટેલાઇટ તસવીરોમાં પણ નદીના માર્ગમાં આવતી ઇમારતો અને રસ્તાઓના મોટા ભાગના અદ્રશ્ય થવાના સંકેતો મળ્યા છે.

નેપાળમાં આ આપત્તિથી મરનારાઓની સંખ્યા ઝડપથી વધી રહી છે. બુધવાર રાત સુધી અલગ-અલગ રિપોર્ટ્સમાં 98 થી વધુ લોકોના મોતની માહિતી સામે આવી છે, જ્યારે આશરે 750 લોકો લાપતા હોવાનું કહેવાય છે. રાહત અને બચાવ એજન્સીઓ હજી પણ પ્રભાવિત વિસ્તારોમાં લોકોની શોધખોળ કરી રહી છે. લાપતા થયેલા લોકોમાં નેપાળ પોલીસ અને આર્મ્ડ પોલીસ ફોર્સના જવાનો પણ સામેલ છે. શરુઆતી રિપોર્ટ્સમાં 50 થી વધુ સુરક્ષાકર્મીઓના લાપતા થવાની વાત સામે આવી હતી. રસુવાના ઉત્તરીય વિસ્તારમાં બોર્ડર આઉટપોસ્ટ પર તૈનાત નેપાળ આર્મ્ડ પોલીસ ફોર્સના 4 જવાનો પણ પૂર બાદથી લાપતા હોવાનું જણાવાયું છે.

તાજા રિપોર્ટ્સ મુજબ, 750 મુસાફરો લાપતા છે. જેમાં 291 વિદેશી નાગરિકો અને 93 નેપાળી નાગરિકો સામેલ છે. વિદેશી નાગરિકોમાં 133 ભારતીયો છે અને 37 એનઆરઆઈ પણ લાપતા હોવાનું જણાવાયું છે. તેમાંથી મોટી સંખ્યા કૈલાશ માનસરોવર યાત્રાએ નીકળેલા લોકોની છે.

આખરે કેમ આવ્યો આટલો ખતરનાક સેલાબ?

નેપાળમાં તબાહી મચાવનાર આ ફ્લેશ ફ્લડના કારણને લઈને તપાસ ચાલી રહી છે. નેપાળના અધિકારીઓ અને વૈજ્ઞાનિકોના શરુઆતી આકલન મુજબ, તિબેટ-નેપાળ સરહદ પાસે આવેલા 4.4 તીવ્રતાના ભૂકંપે પહાડી વિસ્તારમાં બરફ અને ખડકોના મોટા હિસ્સાને અસ્થિર બનાવ્યો હોઈ શકે છે. ત્યારબાદ આઈસ-રોક એવલાંચ (હિમપ્રપાત) થયો અને નદીનો રસ્તો અસ્થાયી રૂપે બંધ થઈ ગયો. આની પાછળ ગ્લેશિયર સાથે જોડાયેલી ઘટના અને અચાનક પાણી જમા થવાની સંભાવનાઓની પણ તપાસ કરવામાં આવી રહી છે.