જાપાનના પીએમ સનાએ તાકાઈચી આજથી ભારત પ્રવાસે, કાલે PM મોદી સાથે કરશે મુલાકાત

જાપાનના વડાપ્રધાન (PM) સનાએ તાકાઈચી આજથી ભારતના 3 દિવસીય પ્રવાસે આવી રહ્યા છે. આ મુલાકાત દરમિયાન તેઓ વડાપ્રધાન નરેન્દ્ર મોદી સાથે મુલાકાત કરશે. બંને દેશો વચ્ચે આર્થિક સંબંધોને મજબૂત કરવા, સેમિકન્ડક્ટર સપ્લાય ચેનને વધુ સુરક્ષિત બનાવવા અને આર્ટિફિશિયલ ઈન્ટેલિજન્સ (AI) ના ક્ષેત્રમાં સહયોગ વધારવા પર મુખ્યત્વે ચર્ચા થવાની સંભાવના છે. 2 જુલાઈના રોજ નવી દિલ્હીમાં વડાપ્રધાન મોદી અને વડાપ્રધાન તાકાઈચી વચ્ચે શિખર વાર્તા (સમિટ) યોજાશે. આ ઉપરાંત, જાપાનના વડાપ્રધાન ભારત-જાપાન સંયુક્ત આર્થિક મંચ (જોઈન્ટ ઈકોનોમિક ફોરમ) માં પણ ભાગ લેશે.

આર્થિક સુરક્ષા પર સંયુક્ત જાહેરાતની સંભાવના

સૂત્રોના જણાવ્યા અનુસાર, બંને નેતાઓની વાતચીત બાદ આર્થિક સુરક્ષા સહયોગ પર એક સંયુક્ત જાહેરાત અને આર્ટિફિશિયલ ઈન્ટેલિજન્સમાં સહયોગને લઈને એક સંયુક્ત નિવેદન બહાર પાડવામાં આવી શકે છે. આ સિવાય ભારત અને જાપાન વચ્ચે અંદાજે 10 જેટલા મહત્વના કરારોને આખરી ઓપ આપવામાં આવે તેવી પણ શક્યતા છે.

સેમિકન્ડક્ટર, મહત્વપૂર્ણ ખનિજો અને દવાઓ પર થશે ચર્ચા

આ બેઠકમાં બંને દેશો સેમિકન્ડક્ટર સપ્લાય ચેનને મજબૂત કરવા ઉપરાંત મહત્વપૂર્ણ ખનિજો અને ફાર્માસ્યુટિકલ્સ (દવા ઉદ્યોગ) માં સહયોગ વધારવાના ઉપાયો પર પણ વિગતવાર ચર્ચા કરશે. આ ક્ષેત્રોને ભવિષ્યની આર્થિક અને તકનીકી સુરક્ષા માટે ખૂબ જ મહત્વપૂર્ણ માનવામાં આવે છે.

સતત મજબૂત થઈ રહ્યા છે ભારત-જાપાન સંબંધો

છેલ્લા કેટલાક વર્ષોમાં ભારત અને જાપાનના સંબંધો સતત મજબૂત થયા છે. વર્ષ 2014 માં બંને દેશોના સંબંધોને વિશેષ વ્યૂહાત્મક અને વૈશ્વિક ભાગીદારીનો દરજ્જો આપવામાં આવ્યો હતો. બંને દેશો વર્ષ 2027 માં રાજદ્વારી સંબંધોની સ્થાપનાના 75 વર્ષ પૂર્ણ કરશે. આ અવસર પહેલા બંને દેશો વેપાર, રોકાણ, આર્થિક સુરક્ષા, સંરક્ષણ, વિજ્ઞાન અને ટેકનોલોજી, સંસ્કૃતિ અને લોકો વચ્ચેના સંપર્ક જેવા અનેક ક્ષેત્રોમાં સહયોગને વધુ મજબૂત કરવા પર કામ કરી રહ્યા છે.

70 થી વધુ સંવાદ તંત્રો સક્રિય ભારત અને જાપાન વચ્ચે હાલમાં 70 થી વધુ દ્વિપક્ષીય સંવાદ તંત્રો સક્રિય છે, જેના દ્વારા વિવિધ ક્ષેત્રોમાં નિયમિત વાતચીત અને સહયોગને આગળ ધપાવવામાં આવે છે. અત્રે ઉલ્લેખનીય છે કે, વડાપ્રધાન નરેન્દ્ર મોદીએ ઓગસ્ટ 2025 માં ટોક્યોની મુલાકાત લીધી હતી, જ્યાં બંને દેશો વચ્ચે 15 મી વાર્ષિક શિખર પરિષદનું આયોજન કરવામાં આવ્યું હતું. આ વાર્ષિક બેઠક ભારત-જાપાન વ્યૂહાત્મક ભાગીદારીને આગળ વધારવા માટેનું સૌથી મહત્વપૂર્ણ મંચ માનવામાં આવે છે.