મુંબઈના ચેમ્બૂરમાં સ્કૂલ વાન પર મોટું ઝાડ પડ્યું: એક વિદ્યાર્થીનું મોત અને અન્ય ઘાયલ

મુંબઈના ચેમ્બૂર વિસ્તારમાં મંગળવારે એક હૃદયદ્રાવક અકસ્માત સર્જાયો હતો. એક સ્કૂલ વાન પર અચાનક એક મોટું ઝાડ તૂટી પડ્યું, જેમાં વાનમાં સવાર આશરે ૧૦ સ્કૂલી બાળકો ફસાઈ ગયા હતા. પોલીસના એક વરિષ્ઠ અધિકારીએ જણાવ્યું કે આ અકસ્માતમાં એક બાળકનું મોત નીપજ્યું છે. અન્ય બાળકોને સુરક્ષિત બહાર કાઢી લેવામાં આવ્યા છે, જ્યારે કેટલાક બાળકો ઘાયલ થયા હોવાના અહેવાલ છે. એક બાળક વાનની અંદર લાંબો સમય ફસાયેલું રહ્યું હતું, જેના કારણે રેસ્ક્યૂ ઓપરેશનમાં થોડો વિલંબ થયો હતો. આ વાન તિલકનગર સ્થિત યુનિવર્સલ સ્કૂલની છે.

ઝાડ કાપીને હટાવવામાં આવ્યું, પછી બાળકોને બહાર કઢાયા

આ અકસ્માત મુંબઈના ચેમ્બૂર વિસ્તારમાં બપોરે ૨ વાગ્યે ને ૫૦ મિનિટે થયો હતો. સ્કૂલ વાન જ્યારે રોડ નંબર ૧૧ પરથી પસાર થઈ રહી હતી, ત્યારે જ અચાનક તેના પર ઝાડ તૂટી પડ્યું હતું. ઘટનાની માહિતી મળતાની સાથે જ પોલીસ અને ફાયર બ્રિગેડની ટીમો તાત્કાલિક ઘટનાસ્થળે પહોંચી ગઈ હતી. ફાયર બ્રિગેડની ટીમે ઝાડને કાપીને હટાવવાનું અને બાળકોને બહાર કાઢવાનું કામ શરૂ કર્યું હતું. ઘટનાસ્થળે લોકોના ભારે ટોળા ઉમટી પડ્યા હતા અને પોલીસના વરિષ્ઠ અધિકારીઓ પણ ત્યાં પહોંચ્યા હતા.

આ અકસ્માતમાં ૧૦ બાળકો ઘાયલ થયા હતા, જેમાંથી ગંભીર રીતે ઘાયલ થયેલા ૫ વિદ્યાર્થીઓને ઝેન હોસ્પિટલમાં દાખલ કરવામાં આવ્યા છે. જ્યારે ૪ બાળકોને સામાન્ય ઈજાઓ થઈ છે. મોટાભાગના બાળકો ૮ થી ૧૪ વર્ષની વયના હોવાનું કહેવાય છે. આ દુર્ઘટનામાં વિહાન શ્રીવાસ્તવને ગંભીર ઈજાઓ થઈ હતી અને સારવાર દરમિયાન તેનું મોત નીપજ્યું હતું.

‘અનેક પત્રો લખવા છતાં BMCએ કોઈ કાર્યવાહી ન કરી‘

આ ઘટનાથી વિસ્તારમાં ફફડાટ ફેલાઈ ગયો છે. ચેમ્બૂરના સ્થાનિક લોકોએ જણાવ્યું કે તેમણે સ્થાનિક સત્તાવાળાઓને અનેક પત્રો લખીને ઝાડોના છાંટણી કરવાની અથવા તેમને હટાવવાની માંગ કરી હતી. આ પહેલા પણ અહીં આવી જ એક ઘટના બની ચૂકી હતી. પરંતુ વારંવાર પત્રો લખવા છતાં બીએમસી (BMC) એ કોઈ સકારાત્મક કાર્યવાહી કરી ન હતી.

મુંબઈમાં ભારે વરસાદની સંભાવના

આ દરમિયાન, ભારતીય હવામાન વિભાગ (IMD) એ આજે મુંબઈ અને તેની આસપાસના વિસ્તારોમાં ભારે વરસાદ અને વાવાઝોડાની આગાહી વ્યક્ત કરી છે.