PM મોદી સેશેલ્સના 50મા સ્વતંત્રતા દિવસની ઉજવણીમાં મુખ્ય અતિથિ તરીકે સામેલ; ભારતીય સૈન્ય ટુકડીએ કરી પરેડ

વડાપ્રધાન નરેન્દ્ર મોદી તેમની સેશેલ્સ મુલાકાત દરમિયાન રવિવારે દેશના 50મા સ્વતંત્રતા દિવસની ઉજવણીમાં મુખ્ય અતિથિ તરીકે સામેલ થયા હતા. આ પ્રથમ વખત છે જ્યારે કોઈ ભારતીય વડાપ્રધાનને સેશેલ્સના રાષ્ટ્રીય દિવસની ઉજવણીમાં મુખ્ય અતિથિ બનવાનું બહુમાન મળ્યું હોય. આ ખાસ પ્રસંગે ભારતીય નૌકાદળ અને સેનાની સંયુક્ત માર્ચિંગ ટુકડીએ પરેડમાં ભાગ લીધો હતો.

ભારતીય નૌકાદળના બેન્ડે પણ પોતાની શાનદાર પ્રસ્તુતિ આપી હતી. ભારતના વિશેષ સન્માનના પ્રતીક રૂપે યુદ્ધ જહાજ INS તરકશ અને INS ઇક્ષકને પોર્ટ વિક્ટોરિયા પર તૈનાત કરવામાં આવ્યા હતા.વડાપ્રધાન મોદીએ સેશેલ્સની જનતાને સ્વતંત્રતા દિવસની હાર્દિક શુભકામનાઓ પણ પાઠવી હતી.

પેટ્રિક હર્મિની સાથે પીએમ મોદીની દ્વિપક્ષીય વાર્તાલાપ

આ પહેલા વડાપ્રધાન મોદી અને સેશેલ્સના રાષ્ટ્રપતિ પેટ્રિક હર્મિની વચ્ચે દ્વિપક્ષીય બેઠક યોજાઈ હતી. બંને નેતાઓએ નીચેના મહત્વના ક્ષેત્રોમાં સહયોગને વધુ મજબૂત કરવા સંમતિ દર્શાવી હતી:

• આરોગ્ય, શિક્ષણ અને કૌશલ્ય વિકાસ

• ડિજિટલ ટ્રાન્સફોર્મેશન અને ટકાઉ વિકાસ (Sustainable Development)

• સામાજિક માળખાકીય સુવિધાઓ અને રિન્યુએબલ એનર્જી (નવીનીકરણીય ઉર્જા)

• સમુદ્રી સુરક્ષા અને સંરક્ષણ સહયોગ

આ બેઠકમાં હિંદ મહાસાગર ક્ષેત્રની સુરક્ષા સાથે જોડાયેલા મુદ્દાઓ પર પણ વિગતવાર ચર્ચા થઈ હતી. બંને દેશોએ ગેરકાયદેસર માછીમારી, ડ્રગ્સની હેરાફેરી અને દરિયાઈ ચાંચિયાગીરી (પાયરસી) જેવા પડકારોનો સામનો મળીને કરવા પર ભાર મૂક્યો હતો. આ ઉપરાંત, ભારત દ્વારા જાહેર કરાયેલા વિશેષ આર્થિક પેકેજ હેઠળ ચાલી રહેલા પ્રોજેક્ટ્સની પ્રગતિ અંગે પણ સંતોષ વ્યક્ત કરવામાં આવ્યો હતો.

ભારત તમામ સંભવિત સહયોગ આપતું રહેશે: PM મોદી

“ભારત સેશેલ્સની વિકાસલક્ષી પ્રાથમિકતાઓમાં તમામ સંભવિત સહયોગ આપતું રહેશે. ભારત બંને દેશો વચ્ચેના લાંબા સમયના વિશ્વાસપાત્ર અને મજબૂત સંબંધોને નવી ઊંચાઈઓ પર લઈ જવા માટે સંપૂર્ણપણે પ્રતિબદ્ધ છે.” — વડાપ્રધાન નરેન્દ્ર મોદી