અમેરિકા-ઈરાનની ઐતિહાસિક શાંતિ ડીલથી ભડક્યું ઈઝરાયલ, ટ્રમ્પને બતાવી આંખો – “અમે કોઈના ગુલામ નથી, સેના પાછી નહીં ખેંચાય!”

પશ્ચિમ એશિયા (મિડલ ઈસ્ટ) ના યુદ્ધને રોકવા માટે અમેરિકા અને ઈરાન વચ્ચે એક ઐતિહાસિક શાંતિ સમજૂતી (MoU) થઈ હોવાના અહેવાલોથી સમગ્ર વિશ્વમાં રાજદ્વારી ગરમાવો આવી ગયો છે. આ કરાર પર આગામી શુક્રવારે સ્વિટ્ઝર્લૅન્ડમાં સત્તાવાર હસ્તાક્ષર થવાના છે, જેનું વૈશ્વિક સ્તરે સ્વાગત કરવામાં આવી રહ્યું છે. જોકે, અમેરિકાના આ આશ્ચર્યજનક પગલાથી તેનો સૌથી નજીકનો સાથી દેશ ઈઝરાયલ અત્યંત નારાજ થયો છે અને તેણે અમેરિકા સામે ખુલ્લેઆમ બળવાખોર વલણ અપનાવી લીધું છે.

ટ્રમ્પની ડીલ સામે ઈઝરાયલી મંત્રીઓની ગર્જના: ‘અમે અમેરિકાને આધીન નથી’

બેન્જામિન નેતન્યાહૂ સરકારના કટ્ટરપંથી અને વરિષ્ઠ મંત્રીઓએ અમેરિકી પ્રમુખ ડોનાલ્ડ ટ્રમ્પ દ્વારા જાહેર કરાયેલા આ શાંતિ કરારને સ્વીકારવાનો સાફ ઈન્કાર કરી દીધો છે.

• નેશનલ સિક્યુરિટી મંત્રી ઇતામાર બેન-ગ્વીર: “ટ્રમ્પની આ સમજૂતી અમને બિલકુલ બંધનકર્તા નથી. ઈઝરાયલ કોઈ ‘બનાના રિપબ્લિક’ નથી કે અમેરિકાને આધીન રહીને નિર્ણયો લે. અમે એક સાર્વભૌમ અને સ્વતંત્ર રાષ્ટ્ર છીએ. હિઝબુલ્લાહના સંપૂર્ણ ખાતમા વિના અમારી સેના એક ઈંચ પણ પાછી નહીં હટે.”

• નાણા મંત્રી બેઝારેલ સ્મોટ્રિચ: “આ સમજૂતી વૈશ્વિક સુરક્ષા માટે અત્યંત જોખમી સાબિત થશે. ઈરાન ક્યારેય પરમાણુ હથિયાર ન બનાવી શકે તે સુનિશ્ચિત કરવા માટે ઈઝરાયલે પોતાની રીતે જ સૈન્ય અભિયાન આગળ વધારવું પડશે.”

લેબેનૉન, સીરિયા કે ગાઝામાંથી પીછેહઠનો સાફ ઇન્કાર

ઈઝરાયલના સંરક્ષણ મંત્રી કાત્ઝે એક ઈમરજન્સી પત્રકાર પરિષદ યોજીને સ્પષ્ટ કર્યું છે કે, કોઈ પણ વૈશ્વિક દબાણ સામે ઝૂક્યા વિના ઈઝરાયલી સેના લેબેનૉન, સીરિયા અને ગાઝા પટ્ટીમાંથી પોતાની પીછેહઠ નહીં કરે. વડાપ્રધાન નેતન્યાહૂએ આ આકરા વલણ અંગે અમેરિકી પ્રમુખને પણ સ્પષ્ટ શબ્દોમાં વાકેફ કરી દીધા છે. સંરક્ષણ મંત્રાલયે ચેતવણી આપી છે કે, જો ઈરાન ફરી કોઈ હિમાકત કરશે, તો ઈઝરાયલ પૂરી તાકાતથી જડબાતોડ વળતો પ્રહાર કરશે.

સરકારના વલણ પર વિપક્ષના આકરા પ્રહારો

આ આંતરરાષ્ટ્રીય તણાવ વચ્ચે ઈઝરાયલના વિપક્ષી નેતા યાયર ગોલાને નેતન્યાહૂ સરકાર પર આકરા પ્રહારો કર્યા છે. તેમણે જણાવ્યું કે, “આપણા બહાદુર સૈનિકોએ લોહી વહાવીને જે સૈન્ય સિદ્ધિઓ મેળવી હતી. તે આ આંતરરાષ્ટ્રીય ડીલથી ધૂળમાં મળી ગઈ છે અને વડાપ્રધાન નેતન્યાહૂ શક્તિહીન થઈને મૂકપ્રેક્ષક બની બધું જોઈ રહ્યા છે.” જોકે, આ સમગ્ર વિવાદ અને કરાર પર વડાપ્રધાન બેન્જામિન નેતન્યાહૂ તરફથી હજુ સુધી કોઈ સત્તાવાર વ્યક્તિગત નિવેદન બહાર આવ્યું નથી.

યુદ્ધની પૃષ્ઠભૂમિ પર એક નજર:

આ ભયાનક સૈન્ય સંઘર્ષની શરૂઆત ૨૮ ફેબ્રુઆરીના રોજ અમેરિકા અને ઈઝરાયલે ઈરાન પર કરેલા સંયુક્ત હુમલા બાદ થઈ હતી. ઈઝરાયલ છેલ્લા ૪ વર્ષમાં સતત ૪ મોટા યુદ્ધો લડી ચૂક્યું છે (૨૦૨૩માં હમાસ, ૨૦૨૪માં હિઝબુલ્લાહ, ૨૦૨૫માં ઈરાન અને ૨૦૨૬માં અમેરિકા-ઈરાન સંઘર્ષ). આ સ્થિતિમાં પોતાના વ્યૂહાત્મક અને સૈન્ય હિતો જોખમાતા હોવાથી ઈઝરાયલ હાલ કોઈ પણ ભોગે યુદ્ધવિરામ કે શાંતિ કરાર સ્વીકારવાના મૂડમાં નથી દેખાઈ રહ્યું.