દેશની અદાલતોમાં લાંબા સમયથી પેન્ડિંગ પડેલા કેસો અને અરજીઓનો ઝડપથી નિકાલ લાવવા માટે સુપ્રીમ કોર્ટે એક મોટો અને ઐતિહાસિક નિર્ણય લીધો છે. સર્વોચ્ચ અદાલતે દેશભરની તમામ હાઈકોર્ટો માટે કડક નિર્દેશો જાહેર કરતા સ્પષ્ટ આદેશ આપ્યો છે કે, જે કેસો અને અરજીઓ પર સુનાવણી પૂર્ણ થઈ ચૂકી છે અને ચુકાદો અનામત (રિઝર્વ) રાખવામાં આવ્યો છે, તેના પર આગામી ૩ મહિનાની અંદર અંતિમ ચુકાદો સંભળાવી દેવામાં આવે.
આ મહત્વપૂર્ણ પગલાનો મુખ્ય હેતુ અદાલતોમાં કેસોનો ભરાવો ઓછો કરવાનો અને કોર્ટ તેમજ વકીલો પર વધતું કામનું ભારણ ઘટાડવાનો છે.
સુપ્રીમ કોર્ટના તમામ નિર્દેશો બંધનકર્તા રહેશે
સુપ્રીમ કોર્ટના ચીફ જસ્ટિસ સૂર્યકાંતની અધ્યક્ષતાવાળી બેંચે બંધારણની કલમ ૧૪૨ (Article 142) હેઠળ મળેલી વિશેષ સત્તાઓનો ઉપયોગ કરીને આ દિશાનિર્દેશો જાહેર કર્યા છે. સુપ્રીમ કોર્ટે ભારપૂર્વક જણાવ્યું છે કે આ આદેશો તમામ ઉચ્ચ અદાલતો માટે સંપૂર્ણપણે બંધનકર્તા રહેશે.
“અમે પેન્ડિંગ કેસોની પરંપરાને ખતમ કરવા માંગીએ છીએ. ચુકાદો આપવામાં થતા વિલંબના ટ્રેન્ડને રોકીને પીડિતોને વહેલામાં વહેલી તકે ન્યાય અપાવવો અનિવાર્ય છે, જેથી દેશના નાગરિકોનો ન્યાય વ્યવસ્થા પરનો ભરોસો વધુ મજબૂત બને.” – સુપ્રીમ કોર્ટ
જામીન અરજીઓ અંગે મહત્વપૂર્ણ આદેશ: એક જ દિવસમાં પ્રક્રિયા પૂર્ણ કરવા તાકીદ
કેસોના નિકાલ ઉપરાંત, સુપ્રીમ કોર્ટે જામીન અરજીઓ અંગે પણ અત્યંત મહત્વપૂર્ણ આદેશો આપ્યા છે:
-
એક જ દિવસમાં કામગીરી: હાઈકોર્ટોએ જામીન અરજી પર સુનાવણી કરવા, ચુકાદો આપવા અને તે આદેશને સત્તાવાર પોર્ટલ પર અપલોડ કરવાનું કામ એક જ દિવસમાં પૂર્ણ કરવાનું રહેશે.
-
ટ્રાયલ કોર્ટને તાત્કાલિક જાણ: જામીન સંબંધિત આદેશો નિચલી અદાલતો (ટ્રાયલ કોર્ટ) સુધી તાત્કાલિક પહોંચાડવા જણાવાયું છે, જેથી જામીન મેળવનાર કેદીઓની મુક્તિ તે જ દિવસે સુનિશ્ચિત કરી શકાય.
-
૨૪ કલાકમાં અપલોડિંગ: કોઈપણ કેસમાં ચુકાદો આવ્યાના ૨૪ કલાકની અંદર તેને વેબસાઈટ પર અપલોડ કરવો ફરજિયાત રહેશે.