ખેડૂતોની વેદના: ધમધોખતા તાપ વચ્ચે કમોસમી વરસાદી આફત, વાઢેલા ઘઉં પર વીજળીના કડાકા સાથે વરસાદી સંકટ.”

રાજ્યમાં કાળઝાળ ગરમી વચ્ચે ખેડૂતો અને જનતા માટે ચિંતાજનક સમાચાર સામે આવ્યા છે. હવામાન વિભાગના મતે, આગામી 29 અને 30 માર્ચ દરમિયાન રાજ્યના હવામાનમાં પલટો આવશે. અગાઉ ૧૯-૨૦ માર્ચે થયેલા કમોસમી વરસાદે જે તબાહી મચાવી હતી, તેવી જ સ્થિતિ ફરી સર્જાવાની ભીતિ સેવાઈ રહી છે.

1. કયા વિસ્તારોમાં મેઘરાજા ધમરોળશે?

હવામાન વિભાગે ખાસ કરીને ઉત્તર ગુજરાત અને સરહદી જિલ્લાઓ માટે ‘યલો એલર્ટ‘ જાહેર કર્યું છે:

• હાઈ-એલર્ટ જિલ્લાઓ: કચ્છ, બનાસકાંઠા, સાબરકાંઠા, અરવલ્લી, દાહોદ અને મહીસાગર.

• વાવાઝોડાની શક્યતા: વરસાદની સાથે ૩૦થી ૪૦ કિમી/કલાકની ઝડપે તેજ પવન ફૂંકાવાની અને વીજળીના કડાકા-ભડાકા થવાની પણ શક્યતા છે.

2. કેમ સર્જાઈ આ વરસાદી આફત?

નિષ્ણાતોના મતે, હાલમાં વાતાવરણમાં એકસાથે ત્રણ સિસ્ટમ સક્રિય થઈ છે: ૧. બે અપર એર સાયક્લોનિક સર્ક્યુલેશન સિસ્ટમ. ૨. એક મજબૂત વેસ્ટર્ન ડિસ્ટર્બન્સ. આ ત્રણેય સિસ્ટમના સંયુક્ત પ્રભાવથી માર્ચના અંતમાં ફરી એકવાર માવઠાનો માહોલ સર્જાશે. જોકે, આગામી એક અઠવાડિયા સુધી તાપમાનમાં કોઈ મોટો વધારો-ઘટાડો જોવા નહીં મળે.

3. માછીમારો અને તાપમાનની વિગતો

• દરિયો ન ખેડવા સૂચના: પવનની દિશા ઉત્તર-પશ્ચિમ તરફ હોવાથી દરિયાકાંઠાના વિસ્તારોમાં હલચલ વધશે. સુરક્ષાના ભાગરૂપે માછીમારોને આગામી સૂચના સુધી દરિયો ન ખેડવા તાકીદ કરવામાં આવી છે.

• તાપમાનની સ્થિતિ: * અમરેલી: ૩૮.૫°C (રાજ્યનું સૌથી ગરમ શહેર)

  • અમદાવાદ: ૩૭°C | ગાંધીનગર: ૩૬.૫°C | રાજકોટ: ૩૦°C

  • કંડલા: ૧૮.૬°C (લઘુતમ – રાત્રે સામાન્ય ઠંડક)