ICC પ્લેયર ઓફ ધ મંથ: ટીમ ઈન્ડિયાની અરુંધતી રેડ્ડીએ રચ્યો ઈતિહાસ, પાકિસ્તાની બેટ્સમેને પણ મારી બાજી

ઇન્ટરનેશનલ ક્રિકેટ કાઉન્સિલ (ICC) દ્વારા 23 માર્ચ 2026 ના રોજ ફેબ્રુઆરી 2026 માટેના પ્રતિષ્ઠિત ‘પ્લેયર ઓફ ધ મંથ’ એવોર્ડની જાહેરાત કરવામાં આવી છે. આ વખતે મહિલા કેટેગરીમાં ભારતની સ્ટાર બોલર અરુંધતી રેડ્ડીએ ઓસ્ટ્રેલિયા સામેના યાદગાર પ્રદર્શનને કારણે બાજી મારી છે, જ્યારે પુરુષ કેટેગરીમાં પાકિસ્તાનના સાહિબઝાદા ફરહાને આ સન્માન મેળવ્યું છે.

અરુંધતી રેડ્ડી: કાંગારુઓના ગઢમાં મચાવ્યો તરખાટ

ભારતીય મહિલા ક્રિકેટર અરુંધતી રેડ્ડીએ ઓસ્ટ્રેલિયા પ્રવાસ પર શાનદાર બોલિંગ કરી ઇતિહાસ રચ્યો છે. આ એવોર્ડ જીતનારી તે ભારતની મહત્વની ખેલાડી બની ગઈ છે.

• પ્રદર્શનની વિગત: ઓસ્ટ્રેલિયા સામેની ૩ મેચની T20 શ્રેણીમાં અરુંધતીએ કુલ 8 વિકેટ ઝડપી હતી.

• શાનદાર આંકડા: તેની બોલિંગ સરેરાશ 10.87 રહી અને માત્ર 7.25 ના ઇકોનોમી રેટથી રન આપ્યા.

• શ્રેષ્ઠ સ્પેલ: સિડનીમાં રમાયેલી મેચમાં તેણે માત્ર ૨૨ રન આપીને 4 વિકેટ ઝડપી ઓસ્ટ્રેલિયન બેટિંગ લાઇન-અપને વેરવિખેર કરી નાખી હતી.

• સ્પર્ધા: આ એવોર્ડની રેસમાં તેણે શ્રીલંકાની હર્ષિતા સમરવિક્રમા અને પાકિસ્તાની ફાતિમા સનાને પાછળ છોડી દીધી હતી.

“ICC પ્લેયર ઓફ ધ મંથ બનવું મારા માટે ગર્વની વાત છે. ઓસ્ટ્રેલિયાને તેમના જ ઘરમાં હરાવવું આસાન નથી, અને આ જીત આગામી વુમન્સ T20 વર્લ્ડ કપ માટે અમારો આત્મવિશ્વાસ વધારશે.” – અરુંધતી રેડ્ડી

પુરુષ કેટેગરી: સાહિબઝાદા ફરહાનનો દબદબો

બીજી તરફ, પુરુષ કેટેગરીમાં પાકિસ્તાનના બેટ્સમેન સાહિબઝાદા ફરહાનને આ એવોર્ડથી નવાજવામાં આવ્યો છે.

• વર્લ્ડ કપ પ્રદર્શન: ફરહાન T20 વર્લ્ડ કપ ૨૦૨૬માં સૌથી વધુ રન બનાવનાર બેટ્સમેન તરીકે ઉભરી આવ્યો હતો.

• કોને હરાવ્યા: તેણે આ એવોર્ડ માટે ઈંગ્લેન્ડના સ્ટાર ઓલરાઉન્ડર વિલ જેક્સ અને અમેરિકાના ફાસ્ટ બોલર શેડલી વેન શાલ્વિકને મ્હાત આપી હતી.

• જોકે પાકિસ્તાની ટીમ સેમીફાઈનલ સુધી પહોંચી શકી નહોતી, પરંતુ ફરહાનના વ્યક્તિગત દેખાવે તેને આ વૈશ્વિક સન્માન અપાવ્યું છે.