હોર્મુઝની સ્ટ્રેટ નજીક ગુજરાત આવી રહેલા થાઈ કાર્ગો જહાજ પર હુમલો, 20 ક્રૂ સભ્યો બચાવાયા

મધ્ય પૂર્વમાં વધતા તણાવ વચ્ચે દરિયાઈ સુરક્ષાને લઈને વધુ એક ગંભીર ઘટના સામે આવી છે. ગુજરાત તરફ જઈ રહેલા એક થાઈ કાર્ગો જહાજને હોર્મુઝની સ્ટ્રેટ નજીક અજાણ્યા પ્રોજેક્ટાઇલના હુમલાનો સામનો કરવો પડ્યો, જેના કારણે જહાજને ભારે નુકસાન થયું અને તેમાં આગ લાગી ગઈ.

અહેવાલો મુજબ, થાઈ ધ્વજ ધરાવતું ‘મયુરી નારી’ નામનું કાર્ગો જહાજ સંયુક્ત આરબ અમીરાતથી ભારતના ગુજરાત રાજ્યના બંદર તરફ જઈ રહ્યું હતું. બુધવારે જહાજ ઓમાનના ઉત્તર કિનારાથી આશરે 11 નોટિકલ માઈલ દૂર હોર્મુઝની સ્ટ્રેટમાંથી પસાર થઈ રહ્યું હતું ત્યારે બે અજાણ્યા પ્રોજેક્ટાઇલ તેના પર અથડાયા.

જહાજમાં આગ, તાત્કાલિક બચાવ કામગીરી

પ્રોજેક્ટાઇલ અથડાતા જહાજના સ્ટર્ન અને એન્જિન રૂમ નજીક વિસ્ફોટ થયો, જેના કારણે જહાજમાં આગ લાગી. પરિસ્થિતિ ગંભીર બનતાં ક્રૂ સભ્યોને જહાજ છોડવાની ફરજ પડી.

ઓમાનની નૌકાદળે તાત્કાલિક બચાવ કામગીરી હાથ ધરી અને લાઇફબોટની મદદથી સમુદ્રમાં ઉતરેલા 20 ક્રૂ સભ્યોને સલામત રીતે બહાર કાઢ્યા. તેમને ઓમાનના કિનારે પહોંચાડવામાં આવ્યા. જોકે, અહેવાલો મુજબ જહાજમાં રહેલા ત્રણ ક્રૂ સભ્યો હજુ પણ ગુમ છે અને તેઓ એન્જિન રૂમ નજીક ફસાયેલા હોવાની આશંકા વ્યક્ત કરવામાં આવી રહી છે.

પ્રાદેશિક તણાવ વચ્ચે ઘટના

હુમલામાં કયા પ્રકારનું હથિયાર વપરાયું તે અંગે હજુ સુધી સત્તાવાર માહિતી મળી નથી. દરિયાઈ સુરક્ષા નિષ્ણાતો આ ઘટનાને તેહરાન સાથે ચાલી રહેલા તણાવ સાથે જોડીને જોઈ રહ્યા છે, જોકે હજુ સુધી કોઈ દેશ અથવા સંગઠને હુમલાની જવાબદારી સ્વીકારી નથી.

થાઈ નૌકાદળ અને દરિયાઈ સુરક્ષા અધિકારીઓએ જણાવ્યું છે કે જહાજ પર અજાણ્યા પ્રોજેક્ટાઇલથી હુમલો થયો હોવાનું પ્રાથમિક તપાસમાં સામે આવ્યું છે અને ઘટનાની તપાસ ચાલુ છે.

ઉલ્લેખનીય છે કે હોર્મુઝની સ્ટ્રેટ વિશ્વના સૌથી મહત્વપૂર્ણ દરિયાઈ વેપાર માર્ગોમાંથી એક છે. વિશ્વના લગભગ 20 ટકા તેલનો પુરવઠો આ માર્ગથી પસાર થાય છે. નિષ્ણાતોનું માનવું છે કે આવી ઘટનાઓ વૈશ્વિક શિપિંગ વ્યવસ્થા અને ઊર્જા પુરવઠા માટે ગંભીર જોખમ ઊભું કરી શકે છે.