મુંબઈની ‘લોકલ’ ભીડમાંથી મહિલાઓને મુક્તિ:..મહારાષ્ટ્ર સરકારનો ફ્લેક્સિબલ ઓફિસ ટાઈમિંગનો ઐતિહાસિક નિર્ણય

આંતરરાષ્ટ્રીય મહિલા દિવસના અવસરે મહારાષ્ટ્ર સરકારે મુંબઈ મેટ્રોપોલિટન રિજન (MMR) માં ફરજ બજાવતી હજારો મહિલા સરકારી કર્મચારીઓને મોટી ભેટ આપી છે. ડેપ્યુટી સીએમ સુનેત્રા પવારે વિધાન પરિષદમાં જાહેરાત કરી છે કે હવે મહિલા કર્મચારીઓ તેમની સુવિધા મુજબ ઓફિસના સમયમાં ફેરફાર કરી શકશે..જેથી તેઓ મુંબઈની જીવાદોરી સમાન લોકલ ટ્રેનોની ભીડથી બચી શકે.

નવી સમય મર્યાદા: કેવી રીતે કામ કરશે આ સિસ્ટમ?

મુંબઈ અને આસપાસના વિસ્તારોમાં મુસાફરીના પડકારોને પહોંચી વળવા માટે સરકારે નીચે મુજબની રાહતો આપી છે:

આવવાનો સમય: મહિલા કર્મચારીઓ સવારે 9:15 થી 9:45 દરમિયાન ઓફિસમાં હાજર થઈ શકશે.

જવાનો સમય: જે મહિલા કર્મચારી સવારે વહેલી આવશે, તેને સાંજે તેટલી જ મિનિટો વહેલા ઘરે જવાની છૂટ મળશે (મહત્તમ 30 મિનિટનો તફાવત).

હેતુ: આ સુવિધાનો મુખ્ય હેતુ સવાર અને સાંજના પીક અવર્સ (ભીડના સમય) દરમિયાન રેલવે સ્ટેશનો અને ટ્રેનોમાં થતી જીવલેણ ભીડથી મહિલાઓને સુરક્ષિત રાખવાનો છે.

મહિલા સુરક્ષા અને કલ્યાણ માટેના અન્ય મોટા પગલાં

ડેપ્યુટી સીએમ પવારે માત્ર સમયમાં છૂટછાટ જ નહીં, પરંતુ મહિલાઓના સર્વાંગી વિકાસ માટે અન્ય મહત્વની સિદ્ધિઓ અને યોજનાઓ પણ રજૂ કરી હતી:

૧. ઓપરેશન ‘મુસ્કાન’ અને ‘શોધ’ની સફળતા

સરકારે ગુમ થયેલા બાળકો અને મહિલાઓને શોધવા માટે ટેકનોલોજીનો અસરકારક ઉપયોગ કર્યો છે:

• ઓપરેશન મુસ્કાન: જુલાઈ 2015 થી ફેબ્રુઆરી 2026 સુધીમાં 42,594 ગુમ થયેલા બાળકોને તેમના પરિવાર સાથે મિલાવ્યા.

• ઓપરેશન શોધ: આ અભિયાન હેઠળ 5,066 મહિલાઓ અને 2,771 બાળકોને શોધી કાઢવામાં આવ્યા છે.

૨. રેલવે સુરક્ષામાં આધુનિકીકરણ

મુંબઈના વ્યસ્ત સ્ટેશનો જેવા કે CSMT, ચર્ચગેટ અને બોરીવલી પર મહિલાઓની સુરક્ષા માટે સાયબર ક્રાઈમ પ્રિવેન્શન સિસ્ટમ અને હાઈ-ટેક સર્વેલન્સ તૈનાત કરવામાં આવ્યું છે.

૩. માતૃત્વ રજા (Maternity Leave) ના નવા નિયમો

મહિલા કર્મચારીઓ માટે કામ અને પરિવાર વચ્ચે સંતુલન જાળવવા સરકારે રજાના નિયમો ઉદાર બનાવ્યા છે:

• 180 દિવસની પેઇડ માતૃત્વ રજા.

• ત્યારબાદ કોઈ પણ મેડિકલ સર્ટિફિકેટ વગર 1 વર્ષ સુધી ‘હાફ-પે લીવ‘ (અડધા પગાર સાથે રજા) ની જોગવાઈ.

૪. આર્થિક સશક્તિકરણની યોજનાઓ

મહિલાઓને આત્મનિર્ભર બનાવવા માટે સરકારની ‘લાડકી બહેન’, ‘નમો મહિલા સશક્તિકરણ’, ‘લેક લાડકી’ અને ‘લખપતિ દીદી’ જેવી યોજનાઓ પાયાનું કામ કરી રહી છે..ઉત્પાદનોના વેચાણ માટે ‘ઉમેદ મોલ‘ અને ‘મહાલક્ષ્મી સરસ‘ જેવા પ્લેટફોર્મ હવે ઓનલાઈન પણ ઉપલબ્ધ છે.