ટોરન્ટો: ગોળીબારમાં 20 વર્ષીય શિવાંકનું મોત,,દૂતાવાસે દુઃખ વ્યક્ત કર્યું

કેનેડાના ટોરન્ટોમાં ગોળીબારમાં એક ભારતીય વિદ્યાર્થી શિવાંક અવસ્થીનું મોત થયું. ટોરન્ટોમાં ભારતીય વાણિજ્ય દૂતાવાસે ગુરુવારે યુનિવર્સિટી ઓફ ટોરન્ટોના સ્કારબોરો કેમ્પસ નજીક ગોળીબારમાં 20 વર્ષીય ભારતીય ડોક્ટરલ વિદ્યાર્થી શિવાંક અવસ્થીના મોત પર દુઃખ વ્યક્ત કર્યું.

એમ્બેસીએ એક નિવેદનમાં જણાવ્યું હતું કે, “યુનિવર્સિટી ઓફ ટોરન્ટોના સ્કારબોરો કેમ્પસ નજીક ગોળીબારની ઘટનામાં યુવાન ભારતીય ડોક્ટરલ વિદ્યાર્થી શિવાંક અવસ્થીના દુઃખદ અવસાન પર અમે અમારી ઊંડી સંવેદના વ્યક્ત કરીએ છીએ.” ભારતીય વાણિજ્ય દૂતાવાસે એક નિવેદનમાં જણાવ્યું હતું કે, “આ મુશ્કેલ સમયમાં દૂતાવાસ શોકગ્રસ્ત પરિવારના સંપર્કમાં છે અને સ્થાનિક અધિકારીઓ સાથે સંકલનમાં તમામ જરૂરી સહાય પૂરી પાડી રહ્યું છે.”

શંકાસ્પદ બંદૂકધારી ગોળીબાર કર્યા પછી ભાગી ગયો

પોલીસે અહેવાલ આપ્યો હતો કે 23 ડિસેમ્બરના રોજ હાઇલેન્ડ ક્રીક ટ્રેઇલ અને ઓલ્ડ કિંગ્સ્ટન રોડ વિસ્તારમાં અવસ્થીને ગોળી મારી દેવામાં આવી હતી. પોલીસ ઘટનાસ્થળે પહોંચી અને ભારતીય વિદ્યાર્થીને ગોળીના ઘાથી પીડાતા જમીન પર પડેલો મળ્યો. શિવાંકને ઘટનાસ્થળે મૃત જાહેર કરવામાં આવ્યો. તપાસકર્તાઓએ જણાવ્યું કે, પોલીસ આવે તે પહેલાં શંકાસ્પદ લોકો ભાગી ગયા હતા.

પોલીસે વિસ્તારની તપાસ કરતી વખતે કેમ્પસને થોડા સમય માટે બંધ કરી દેવામાં આવ્યું હતું. આ હત્યા ટોરન્ટોમાં આ વર્ષે નોંધાયેલ 41મો હત્યાકાંડ છે..આ હત્યાથી યુનિવર્સિટી ઓફ ટોરોન્ટો સ્કારબરોના વિદ્યાર્થીઓમાં ભય અને ગુસ્સો ફેલાયો છે.

શિવાંકને કેમ્પસમાં ધોળા દિવસે ગોળી મારી દેવામાં આવી

રેડિટ પર એક પોસ્ટમાં, એક વિદ્યાર્થીએ અહેવાલ આપ્યો હતો કે શિવાંક અવસ્થીને કેમ્પસ વેલીની અંદર ધોળા દિવસે ગોળી મારી દેવામાં આવી હતી..જે વિદ્યાર્થીઓ દ્વારા ખૂબ જ ઉપયોગમાં લેવાતો વિસ્તાર છે અને યુનિવર્સિટી દ્વારા વારંવાર તેનો ઉલ્લેખ કરવામાં આવે છે. શિવાંક અવસ્થીની ઓળખ ત્રીજા વર્ષના જીવન વિજ્ઞાનના વિદ્યાર્થી તરીકે થઈ હતી.