તુર્કીમાં વિમાન દુર્ઘટના,લિબિયાના લશ્કરી વડા સહિત સાત લોકોના મોત

તુર્કીમાં એક મોટી વિમાન દુર્ઘટના સર્જાઈ.જેમાં લિબિયાના વડાપ્રધાન અબ્દુલ-હામિદ દબેબેહે તુર્કીમાં વિમાન દુર્ઘટનામાં દેશના લશ્કરી વડા મુહમ્મદ અલી અહેમદ અલ-હદ્દાદ સહિત સાત લોકોના મોતની પુષ્ટિ કરી છે.મંગળવારે સાંજે જ્યારે એક લિબિયન પ્રતિનિધિમંડળ તુર્કીની રાજધાની અંકારાની સત્તાવાર મુલાકાતથી ઘરે પરત ફરી રહ્યું હતું ત્યારે આ અકસ્માત થયો હતો.

વડાપ્રધાન દબેબેહે જારી કરેલા એક નિવેદનમાં આ ઘટનાને “આકસ્મિક અને અત્યંત દુ:ખદ” ગણાવતા કહ્યું કે, તે “લિબિયા માટે મોટું નુકસાન” છે.તેમણે મૃતકોના પરિવારો પ્રત્યે સંવેદના પણ વ્યક્ત કરી.રાજધાની અંકારાથી ટેકઓફ કર્યા પછી લિબિયન લશ્કરી વડા, અન્ય ચાર અધિકારીઓ અને ત્રણ ક્રૂ સભ્યોને લઈ જતું એક ખાનગી વિમાન ક્રેશ થયું..જેમાં સવાર તમામ લોકોના મોત થયા.લિબિયન અધિકારીઓએ જણાવ્યું કે ટેકનિકલ ખામીને કારણે આ દુર્ઘટના થઈ.

ટેકનિકલ ખામીને કારણે સંપર્ક તૂટી ગયો

લિબિયન અધિકારીઓના જણાવ્યા મુજબ, ટેકઓફ થયાના લગભગ 30 મિનિટ પછી વિમાન સાથેનો સંપર્ક સંપૂર્ણપણે તૂટી ગયો હતો.પ્રારંભિક માહિતીમાં જણાવાયું છે કે,ટેકનિકલ ખામીને કારણે સંપર્ક તૂટી ગયો હતો.તુર્કીના અધિકારીઓએ જણાવ્યું કે, લિબિયન પ્રતિનિધિમંડળ બંને દેશો વચ્ચે લશ્કરી સહયોગને પ્રોત્સાહન આપવાના હેતુથી ઉચ્ચ સ્તરીય સંરક્ષણ વાટાઘાટો માટે અંકારામાં હતું.

કાટમાળ મળી આવ્યો, ક્રેશની પુષ્ટિ

અગાઉ, ગૃહમંત્રી અલી યેરલિકાયાએ જણાવ્યું કે,લિબિયન લશ્કરી વડા અને અન્ય ચાર લોકોને લઈ જનારા ફાલ્કન-50-ક્લાસ ખાનગી જેટનો કાટમાળ અંકારા નજીક મળી આવ્યો હતો.જોકે, લિબિયન વડા પ્રધાને પાછળથી સત્તાવાર રીતે પુષ્ટિ આપી હતી કે બધા માર્યા ગયા છે.

દુર્ઘટનામાં માર્યા ગયેલા અન્ય ચાર અધિકારીઓમાં લિબિયન ભૂમિ દળોના વડા જનરલ અલ-ફિતુરી ગેરાબિલ, લશ્કરી ઉત્પાદન સત્તામંડળના વડા બ્રિગેડિયર જનરલ મહમૂદ અલ-કતાવી, ચીફ ઓફ સ્ટાફના સલાહકાર મોહમ્મદ અલ-અસાવી દિઆબ અને ચીફ ઓફ સ્ટાફની ઓફિસમાં કામ કરતા લશ્કરી ફોટોગ્રાફર મોહમ્મદ ઓમર અહેમદ મહજુબનો સમાવેશ થાય છે.ત્રણ ક્રૂ સભ્યોની ઓળખ તાત્કાલિક જાણી શકાઈ નથી.

ઉડ્ડયનના થોડા સમય પછી જ આ અકસ્માત થયો હતો.

તુર્કીના ગૃહમંત્રીના જણાવ્યા અનુસાર, વિમાને મંગળવારે રાત્રે 8:30 વાગ્યે અંકારાના એસેનબોગા એરપોર્ટથી ઉડાન ભરી હતી.લગભગ 40 મિનિટ પછી એર ટ્રાફિક કંટ્રોલનો વિમાન સાથેનો સંપર્ક તૂટી ગયો.વિમાને અગાઉ અંકારાના દક્ષિણમાં આવેલા હેમાના જિલ્લા નજીક ઇમરજન્સી લેન્ડિંગ સિગ્નલ મોકલ્યો હતો. સ્થાનિક ટીવી ચેનલો પર દર્શાવવામાં આવેલા સુરક્ષા કેમેરા ફૂટેજમાં હેમાના વિસ્તારમાં આકાશમાં અચાનક પ્રકાશનો ઝબકારો જોવા મળ્યો. જેને સંભવિત વિસ્ફોટ તરીકે અર્થઘટન કરવામાં આવ્યું.