વડાપ્રધાન નરેન્દ્ર મોદી 15 થી 19 જૂન સુધી જશે વિદેશ પ્રવાસે

વડાપ્રધાન નરેન્દ્ર મોદી 15 થી 19 જૂન સુધી વિદેશ પ્રવાસે જશે..આ સમય દરમિયાન મોદી કેનેડા, સાયપ્રસ અને ક્રોએશિયાની મુલાકાત લેશે.

વડાપ્રધાન કેનેડામાં G-7 સમિટમાં ભાગ લેશે..જે ભારતના વૈશ્વિક રાજદ્વારી સંબંધોને મજબૂત બનાવવા તરફ એક મહત્વપૂર્ણ પગલું હશે.આ મુલાકાત ભારતના આંતરરાષ્ટ્રીય સંબંધોને નવી ઊંચાઈઓ પર લઈ જશે. મોદી કેનેડાના પ્રધાનમંત્રી માર્ક કાર્નીના આમંત્રણ પર કનાનાસ્કિસમાં G-7 સમિટમાં હાજરી આપશે. આ તેમની છઠ્ઠી G-7 ભાગીદારી હશે. તેઓ G-7 દેશો, અન્ય આમંત્રિત દેશો અને આંતરરાષ્ટ્રીય સંગઠનોના નેતાઓ સાથે ઊર્જા સુરક્ષા, ટેકનોલોજી, કૃત્રિમ બુદ્ધિ (AI) અને ક્વોન્ટમ જેવા વૈશ્વિક મુદ્દાઓ પર ચર્ચા કરશે. આ દરમિયાન, ઘણી દ્વિપક્ષીય બેઠકો પણ યોજાશે.

વડાપ્રધાન મોદી સાયપ્રસના રાષ્ટ્રપતિ નિકોસ ક્રિસ્ટોડોલિડ્સના આમંત્રણ પર 15-16 જૂને સાયપ્રસની મુલાકાત લેશે. 20 વર્ષ પછી ભારતીય પ્રધાનમંત્રીની સાયપ્રસની આ પહેલી મુલાકાત હશે.નિકોસિયામાં તેઓ રાષ્ટ્રપતિ ક્રિસ્ટોડોલિડ્સ સાથે દ્વિપક્ષીય વાટાઘાટો કરશે..લિમાસોલમાં વ્યાપારી નેતાઓને સંબોધિત કરશે.આ મુલાકાત ભારત-સાયપ્રસ સંબંધોને મજબૂત બનાવવા અને યુરોપિયન યુનિયન અને ભૂમધ્ય ક્ષેત્ર સાથે સહયોગ વધારવામાં મહત્વપૂર્ણ રહેશે.

ક્રોએશિયન વડાપ્રધાન આન્દ્રેજ પ્લેન્કોવિકના આમંત્રણ પર મોદી 18 જૂને ક્રોએશિયાની મુલાકાત લેશે. આ કોઈ ભારતીય વડાપ્રધાનની ક્રોએશિયાની પ્રથમ મુલાકાત હશે.. જે બંને દેશો વચ્ચેના સંબંધોમાં ઐતિહાસિક રહેશે. તેઓ વડાપ્રધાન પ્લેન્કોવિક સાથે વાતચીત કરશે… અને રાષ્ટ્રપતિ ઝોરાન મિલાનોવિકને મળશે. આ મુલાકાત ભારતના યુરોપિયન યુનિયન સાથેના સંબંધોને વધુ મજબૂત બનાવશે.

વિદેશ મંત્રાલયના જણાવ્યા અનુસાર, આ મુલાકાતો ભારતના વૈશ્વિક રાજદ્વારી સંબંધોને નવી દિશા આપશે. સાયપ્રસ અને ક્રોએશિયા સાથે પહેલીવાર થઈ રહેલી આ મુલાકાતો વેપાર, સંસ્કૃતિ અને વ્યૂહાત્મક સહયોગને પ્રોત્સાહન આપશે. G-7 સમિટમાં ભારતની અસરકારક ભૂમિકાને વૈશ્વિક મંચ પર ફરીથી પ્રકાશિત કરવામાં આવશે.