ભારતે અમેરિકા સાથે 31 પ્રિડેટર ડ્રોન ખરીદવાનો સોદો કર્યો છે. બંને દેશો વચ્ચે આ ડીલ પર બંને પક્ષોએ હસ્તાક્ષર કર્યા હતા. એક અધિકારીએ આ માહિતી આપી. આ ડીલને લઈને બંને દેશો વચ્ચે લાંબા સમયથી વાતચીત ચાલી રહી હતી. આ ડીલ 32 હજાર કરોડ રૂપિયાની છે. આનાથી સમુદ્રથી સપાટી અને આકાશ સુધી ભારતની સ્ટ્રાઇક અને સર્વેલન્સ ક્ષમતામાં અસરકારક રીતે વધારો થશે. સંરક્ષણ પરની કેબિનેટ સમિતિએ ગયા અઠવાડિયે જ આ ડીલને મંજૂરી આપી દીધી હતી. ભારતમાં આયોજિત એક કાર્યક્રમમાં બંને દેશોના ઉચ્ચ અધિકારીઓ અને સૈન્ય અધિકારીઓની હાજરીમાં આ ડીલ પર હસ્તાક્ષર કરવામાં આવ્યા હતા.
હિંદ મહાસાગરમાં ભારતની દેખરેખ ક્ષમતામાં જબરદસ્ત વધારો થશે
ભારત દ્વારા 31 પ્રિડેટર ડ્રોન ખરીદવાના સંરક્ષણ સોદાની જાહેરાત ગયા વર્ષે વડાપ્રધાન મોદીની અમેરિકા મુલાકાત દરમિયાન કરવામાં આવી હતી. આ ડીલના મહત્વ અંગે યુએસ સ્ટેટ ડિપાર્ટમેન્ટના પ્રવક્તા મેથ્યુ મિલરે કહ્યું હતું કે આ ડીલ બંને દેશોના વ્યૂહાત્મક ટેકનિકલ સહયોગ અને સૈન્ય સહયોગમાં નોંધપાત્ર વધારો કરશે. સંરક્ષણ નિષ્ણાતોના મતે, પ્રિડેટર ડ્રોન MQ-9Bના અધિગ્રહણથી હિંદ મહાસાગરમાં ભારતીય નૌકાદળની દેખરેખ શક્તિ અનેક ગણી વધી જશે. આ પ્રિડેટર ડ્રોન અમેરિકન કંપની જનરલ એટોમિક્સ પાસેથી ખરીદવામાં આવશે. આ ડીલ ભારત અને અમેરિકાની સરકારો વચ્ચે ફોરેન મિલિટરી સેલ્સ કોન્ટ્રાક્ટ હેઠળ કરવામાં આવી છે. ડીલ હેઠળ મળેલા 31 પ્રિડેટર ડ્રોનમાંથી ભારતીય નેવીને 15 ડ્રોન મળશે. જ્યારે એરફોર્સ અને આર્મીને 8-8 ડ્રોન મળશે.