પાકિસ્તાન અને ચીન સંયુક્ત સુરક્ષા ટુકડીઓની સ્થાપના માટે સમજૂતી કરવા જઈ રહ્યાં છે. આ કરારથી પાકિસ્તાનમાં ચીની સૈનિકોની તૈનાતીનો માર્ગ ખુલશે. ચીનનું કહેવું છે કે આ સુરક્ષા કરાર પાકિસ્તાનમાં રહેતા હજારો ચીની નાગરિકોની સુરક્ષા કરશે, કારણ કે કેટલાંક ઘાતક આતંકવાદી હુમલાઓએ તેમના અબજો ડોલરનું રોકાણ જોખમમાં મૂક્યું છે. જોકે, નિષ્ણાતોને શંકા છે કે ચીન પાકિસ્તાન દ્વારા ભારતને ઘેરવાનો પ્રયાસ કરી રહ્યું છે. પાકિસ્તાન પહેલાથી જ ચીનની મદદથી પાકિસ્તાન અધિકૃત કાશ્મીર, ગિલગિટ બાલ્ટિસ્તાન સહિત ઘણા વિસ્તારોમાં સૈન્ય માળખાને ઝડપથી મજબૂત કરી રહ્યું છે.
ચીની સૈનિકો પાકિસ્તાનમાં કામ કરશે
નિક્કી એશિયાના રિપોર્ટ પ્રમાણે બંને દેશો વચ્ચેના સુરક્ષા કરાર બાદ ચીની સૈનિકો પાકિસ્તાનની અંદર કામ કરી શકશે. જો કે આ પહેલા ચીને પણ પોતાની સેના તૈનાત કરવાનો પ્રસ્તાવ રજૂ કર્યો હતો. પરંતુ ત્યારબાદ પાકિસ્તાને ચીનના પ્રસ્તાવ સામે પોતાનો વિરોધ વ્યક્ત કર્યો હતો. હવે નવા કરાર બાદ ચીનના નાગરિકોને બખ્તરબંધ વાહનોમાં અહીં-ત્યાં લઈ જઈ શકાશે. પાકિસ્તાનના ટોચના રોકાણકાર ચીને તાજેતરના વર્ષોમાં તેના નાગરિકો પર થયેલા અનેક ઘાતક હુમલા બાદ ભવિષ્યના સોદાઓ અંગે ઈસ્લામાબાદને કડક ચેતવણી આપી છે. એવું માનવામાં આવે છે કે હજારો ચીની નાગરિકો પણ પાકિસ્તાનમાં CPEC અને અન્ય ઘણા પ્રોજેક્ટ્સ પર કામ કરી રહ્યા છે.
પાકિસ્તાનમાં આતંકવાદી ઘટનાઓ સતત વધી રહી છે. ગ્વાદર બંદર બલૂચિસ્તાનમાં જ આવેલું છે, જે 60 બિલિયન ડોલરથી વધુ મૂલ્યના ચાઇના-પાકિસ્તાન ઇકોનોમિક કોરિડોર (CPEC) માટે એક મહત્વપૂર્ણ સ્થળ છે. પાકિસ્તાને બલૂચિસ્તાનના સંસાધનોનું શોષણ કરવા માટે પોતાના નાગરિકો પર પણ જબરદસ્ત અત્યાચાર કર્યા છે. ચીને પાકિસ્તાન પર પોતાના નાગરિકોની સુરક્ષા માટે કડક કાર્યવાહી કરવા દબાણ કર્યું છે. CPEC, ચીનની વૈશ્વિક બેલ્ટ એન્ડ રોડ પહેલનો મુખ્ય ઘટક, પાકિસ્તાનમાંથી પસાર થાય છે. આ પ્રોજેક્ટને પૂર્ણ કરવા માટે મોટાભાગના ચીની નાગરિકો પાકિસ્તાનમાં છે. પરંતુ ભાગલાવાદીઓ અને કટ્ટરવાદીઓ દ્વારા તેમના પર હુમલા વધી રહ્યા છે. આવી સ્થિતિમાં ચીને પાકિસ્તાન પર પોતાના નાગરિકોને બખ્તરબંધ વાહનોમાં લઈ જવા માટે દબાણ કર્યું છે.