દિલ્હીના મુખ્યમંત્રી અરવિંદ કેજરીવાલની અરજી પર સુનાવણી દરમિયાન EDએ રાઉઝ એવન્યુ કોર્ટમાં દાવો કર્યો હતો કે તેમના ઘરેથી જાણીજોઈને મીઠાઈઓ મોકલવામાં આવી રહી છે જેથી તેમનું શુગર લેવલ વધે. ED તરફથી હાજર રહેલા એડવોકેટ જુહૈબ હુસૈને કોર્ટમાં કહ્યું કે અરવિંદ કેજરીવાલના ઘરેથી જાણીજોઈને આવો ખોરાક આવે છે, જેનાથી તેમનું શુગર લેવલ વધી જાય છે. વકીલે કહ્યું, “તેમને જાણીજોઈને ઘરેથી બટાકા, પુરી, કેરી, મીઠાઈઓ અને અન્ય મીઠી વસ્તુઓ આપવામાં આવી રહી છે જેથી કરીને તેમને તબીબી આધાર પર જામીન મળી શકે. અમે જેલ ઓથોરિટી પાસેથી રિપોર્ટ માંગ્યો છે.”
કેજરીવાલના વકીલે શું કહ્યું?
સીએમ અરવિંદ કેજરીવાલના વકીલ વિવેક જૈને EDના વકીલની દલીલોનો વિરોધ કર્યો અને કહ્યું કે આ નિવેદન મીડિયા માટે આપવામાં આવી રહ્યું છે. તેમણે કહ્યું, “અરવિંદ કેજરીવાલની ફાસ્ટિંગ સુગર 243 હતી, જે ઘણી વધારે છે. તેમને માત્ર ડૉક્ટરોના નિર્દેશ મુજબ જ ભોજન આપવામાં આવી રહ્યું છે.”
કોર્ટે ડાયટ ચાર્ટ માંગ્યો
કોર્ટે અરવિંદ કેજરીવાલના વકીલોને કહ્યું કે અમે જેલ પાસેથી રિપોર્ટ માંગીશું. કોર્ટે કહ્યું કે તમે અમને અરવિંદ કેજરીવાલનો ડાયટ ચાર્ટ આપો. EDએ કહ્યું કે તમે જેલના ડીજી પાસેથી રિપોર્ટ માંગી શકો છો. આ મામલામાં આગામી સુનાવણી 19 એપ્રિલે બપોરે 2 વાગ્યે થશે.
કોર્ટમાં ED દ્વારા લગાવવામાં આવેલા આરોપો બાદ સીએમ અરવિંદ કેજરીવાલના વકીલ વિવેક જૈને કહ્યું કે તેમને જેલમાં તે જ ભોજન આપવામાં આવી રહ્યું છે જે ડોક્ટરે સૂચવ્યું છે. જૈને કહ્યું, “ઈડી દ્વારા આ મુદ્દો જાણી જોઈને બનાવવામાં આવ્યો હતો, જેથી તેમના ઘરેથી આવતા ભોજનને રોકી દેવામાં આવે. આ અરવિંદ કેજરીવાલના સ્વાસ્થ્યનો મામલો છે.”
શું હતી અરજી?
દિલ્હી દારૂ કૌભાંડ કેસમાં ધરપકડ કરાયેલા દિલ્હીના મુખ્યમંત્રી અરવિંદ કેજરીવાલના સુગર લેવલના નિયમિત પરીક્ષણની માંગ કરતી અરજી રાઉઝ એવન્યુ કોર્ટમાં દાખલ કરવામાં આવી હતી. કેજરીવાલના વકીલે કહ્યું હતું કે તેમનું શુગર લેવલ સતત વધઘટ થઈ રહ્યું છે અને ધરપકડ પહેલા તેમને તપાસ કરી રહેલા ડૉક્ટર પાસેથી અઠવાડિયામાં ત્રણ દિવસ વર્ચ્યુઅલ કન્સલ્ટેશનની મંજૂરી આપવી જોઈએ. અરજીમાં કેજરીવાલના વકીલે કહ્યું કે EDની કસ્ટડી દરમિયાન કેજરીવાલનું બ્લડ શુગર લેવલ 46 પર આવી ગયું હતું