ઝારખંડ રાજ્યમાં હાથીના કારણે અનેક શહેરો અને વિસ્તારોમાં ભયનો માહોલ છે. એમ તો હાથીને ખૂબ જ શાંત સ્વભાવના માનવામાં આવે છે, પરંતુ જ્યારે તે ગુસ્સામાં હોય છે ત્યારે તે ખૂબ જ ખતરનાક બની જાય છે. આવો જ એક હાથી રાજ્યમાં લોકોના જીવનો દુશ્મન બની ગયો છે. આંકડાઓ અનુસાર, છેલ્લા કેટલાક દિવસોમાં હાથીએ 16 લોકોનો જીવ લઈ લીધો છે. હવે આ હાથીના ડરને કારણે લોકો ઘરની બહાર નીકળતા ડરી રહ્યા છે.
હાથીએ 12 કલાકમાં લઈ લીધો 4નો જીવ
આ મામલામાં એક અધિકારીએ જણાવ્યું કે મંગળવારે લોહરદગા જિલ્લામાં એક હાથીએ ભારે ઉત્પાત મચાવ્યો હતો. હાથીએ માત્ર 12 કલાકમાં ચાર લોકોના જીવ લઈ લીધા. મૃતકોમાં ત્રણ મહિલાઓ પણ સામેલ છે. તેમણે જણાવ્યું કે ચારેય લોકોને હાથીએ કચડીને મારી નાખ્યા હતા. હાથીના હુમલા બાદ ગામના લોકોમાં ભયનો માહોલ છે. તેઓ ડરી ગયા છે, કોઈ ઘરની બહાર પણ નથી નીકળી રહ્યું. આ સાથે તેમણે કહ્યું કે આ હાથીને જોવા માટે મોટી ભીડ એકઠી થઈ રહી છે. આનાથી હાથી વધુ ખતરનાક થઈ શકે છે. તેથી, કોઈપણ અપ્રિય પરિસ્થિતિને ટાળવા માટે, વહીવટીતંત્રે આ વિસ્તારમાં કલમ-144 લાગુ કરી દીધી છે, જેથી હાથીની આસપાસ ભીડ એકઠી ન થાય અને તેને નિયંત્રિત કરવામાં સરળતા રહે.
તાજેતરના દિવસોમાં વધ્યા છે આવા કેસ
આ મામલામાં ડીએફઓએ કહ્યું કે મૃતદેહોને પોસ્ટમોર્ટમ માટે મોકલી દેવામાં આવ્યા છે. મૃતકોના પરિજનોને 25-25 હજાર રૂપિયાની તાત્કાલિક રાહત આપવામાં આવી છે. બાદમાં, સરકારી પ્રક્રિયા પૂર્ણ થયા બાદ, દરેક પીડિત પરિવારને 3.75 લાખ રૂપિયાનું વળતર આપવામાં આવશે. તમને જણાવી દઈએ કે તાજેતરના વર્ષોમાં ઝારખંડમાં માણસો અને હાથીઓ વચ્ચેના સંઘર્ષમાં વધારો થયો છે. અહેવાલો અનુસાર, 2021-22માં હાથીઓના હુમલામાં 133 લોકોના મોત થયા છે. આ સંખ્યા 2020-21માં 84 કરતાં વધુ છે.